له اوږده ځنډ وروسته دولتي او خصوصي ښوونځي بیرته پرانیستل کیږي

تاند(دوشنبه، د اسد ۲۰) له شاوخوا پنځه میاشتې ځنډ وروسته کابینې نن د دولتي او خصوصي ښوونځیو د بیا پرانستل کیدو طرحه تصویب کړه.

وروسته له هغې چې کورونا ویروس افغانستان ته راورسید، نو ورسره سم مکتبونه، پوهنتونوونه او تعلیمي مراکز د نامعلوم وخت لپاره وتړل شول، چې بلاخره له شاوخوا پنځه میاشتني ځنډ وروسته نن د ولسمشر غني په مشرۍ د کابینې غړو د دولتي او خصوصي ښوونځیو د پرانستل کیدو پریکړه تصویب کړه، چې له مخې به یې د روان کال د سنبلې میاشتې له لومړۍ نیټې څخه دولتي ښوونځیو یولسم او دولسم، د شپنیو مکاتبو له اووم څخه تر دولسم او همداشان خصوصي ښوونځي به بیا له لومړۍ ټولګي څخه تر دولسم ټولګي پورې د عامې روغتیا وزارت د روغتیايي دستورالعملونو په رعایت کولو سره پیل شي.

که څه هم د کورونا ویروس څپې په پوره ډول له منځه تللي نه دي، خو بیا هم د دغه ویروس له کمزوري کیدو سره سم کابینې دې ته زړه ښه کړی تر څو په حضوري شکل د ښوونځیو درسونه پیل شي.

هیره دې نه وي چې تردې وړاندې اټکل داسې وه، چې ښوونځي به د اسد میاشتې په پنځلسمه له پوهنتونونو سره یوځای پیل شي، خو کابینې دا پریکړه رد کړه او د ښوونځیو پیل ته یې اجازه ورنه کړه.

که څه هم تر دې وړاندې طالبانو پخپلو سیمو کې د حضوري درسونو د پیل خبر ورکړی وه، خو نن یې په پروان ولایت کې ۷۲ ښوونځیو ته د کابینې تر پریکړې مخکې د پرانیستل کیدو امر کړی وه.

https://taand.net/%d9%be%d8%b1%d9%88%d8%a7%d9%86-%da%a9%db%90-%d8%b7%d8%a7%d9%84%d8%a8%d8%a7%d9%86%d9%88-%db%b7%db%b2-%da%9a%d9%88%d9%88%d9%86%da%81%db%8c%d9%88-%d8%aa%d9%87-%d8%af-%d9%be%d8%b1%d8%a7%d9%86%db%90%d8%b3/