تاند (شنبه، د اسد ۱۸) د سولې لپاره د مشورتي لویې جرګې د دویمې ورځې په پای ته رسېدو سره د جرګې کاري کمېټو خپل وړاندیزونه او پرېکړې په اتلس مادو کې وړاندې کړل.
د ملي روغې جوړې له عالي شورا څخه په خپره شوې خبرپاڼه کې راغلي، د لویې جرګې کاري کمېټو ګڼ شمېر مشورې حکومت ته ورکړې او د ۴۰۰ طالب بندیانو د خلاصون غوښتنه یې کړې او هم مهال یې له قید او شرط پرته د دوه اړخیز اوربند پر تینګېدو هم ټینګار کړی دی.
د دغې جرګې مهمې پرېکړې په دې ډول دي:
حکومت دې پاتې ۴۰۰ طالب بندیان خوشې کړي، څو په هېواد کې د جګړې دوام ته کومه بهانه پاتې نه شي.
دواړه لوري دې باعزته سولې ته د رسېدو لپاره نرمښت وښيي او د بندیانو له خلاصون سره دې دوامداره اوربند ټینګ شي.
ښکیل لوري دې اوربند ته ژمن پاتې شي او بین الافغاني مذاکرات دې ژر تر ژره پیل شي.
د سولې خبرې دې په افغانستان کې د ننه تر سره شي او طالبان دې له ترهګریزو کړنو لاس واخلي.
د زندانیانو د خوشې کېدو سره دې ملي او نړیوال ضمانتونه واخیستل شي او د سولې په خبرو کې دې له جمهوریت، د بیان له ازادۍ، د ښځو حقونو او د تېرو ۱۹ کلونو په موده کې چې کومې لاسته راوړنې لرو په کلکه دې ترې دفاع وشي.
همدارنګه د سولې هوکړې دې د ملګرو ملتونو او نورو نړیوالو او سیمه ییزو سازمانونو تر څار لاندې ترسره شي.
د کاري کمېټو تر اعلان وروسته د ملي روغې جوړې عالي شورا مشر وویل د بندیانو تر خلاصون وروسته به د افغانانو تر منځ خبرې اترې پیل شي او د سولې مشورتي لویې جرګې وروستۍ پرېکړه به سبا اعلان شي.
ښاغلي عبدالله چې نن یې په کابل کې یوې خبري غونډې ته وینا کوله وویل، د افغانانو تر منځ د خبرو د پیل پر وړاندې د طالب بندیانو له خلاصون پرته بل خنډ نشته او ددغو زندانیانو تر خوشې کېدو درې ورځې وروسته به په قطر کې د بین الافغاني مذاکراتو لومړی پړاو پیل شي.
نوموړي زیاته کړه، که څه هم د مشورتي لویې جرګې ځیني غړو د طالب بندیانو له خوشې کېدو سره مخالف درلود خو نهایي پرېکړه دا شوه چې زندانیان باید خوشې شي څو د جګړې د دوام لپاره کومه بهانه پاتې نه شي.
د ملې روغې جوړې عالي شورا مشر وویل، د جرګې غړو د سولې د راتلونکي په اړه خپلې اندېښنې او وړاندیزونه له دوی سره شریک کړي چې په مخامخ خبرو که به ټولو اندېښنو ته په پام مقابل لوري سره مخته لاړ شي.