تاند ( شنبه ـ د سنبلې ۳۱مه) د افغانستان د فوټسال ملي لوبډله نن مازیګر په ازبکستان کې د ۲۰۲۴ فوټسال نړیوال جام په ګروپي سیالیو کې خپله وروستۍ لوبه کوي.
افغان لوبډله په خپله درېیمه او وروستۍ ګروپي لوبه کې له اکراین سره لوبېږي. د نننۍ لوبې په ګټلو سره افغان لوبډله دوهم پړاو ته د رسېدو چانس لري.
د افغانستان د فوټسال ملي لوبډلې په خپله لومړۍ لوبه کې انګولا ته ماتې ورکړه خو په دوهمه لوبه کې یې له ارجنټاین څخه ماتې وخوړه.
بل لورته بیا د افغانستان د کرکټ ملي لوبډله سبا یکشنبه له جنوبي افریقا سره د درې یو ورځنیو لوبو وروستۍ لوبه ترسره کړي.
د افغانستان د کرکټ ملي لوبډلې پرون جمعه د جنوبي افریقا لوبډلې ته په دوهمه لوبه کې هم په لوی توپیر ماتې ورکړه.
افغان لوبډلې د پچې تر ګټلو وروسته توپوهنه غوره کړه چې د ۴ لوبغاړو په سوځېدو سره یې ۳۱۱ منډې وکړې.
جنوبي افریقا یوازې ۱۳۴ منډې وکړې او ټول لوبغاړي یې له لاسه ورکړل،چې په دې بریا سره افغان لوبډلې روانه لوبلړۍ ۲-۰ په خپل نوم کړه.