نغـري کې یــو بل تــه اړم دي لرګي
ځکه د اور خوراک ته سـم دي لرګې
اوس مو چارتراش نورو ملکو ته نه ځي
اوس تابـوتـونو ته هم کــم دي لرګي
هو زورور ته ترې امسا جوړه شي
خو د کمزوري په سر بـم دي لرګي
اوږده بـــاڼه یې بیا په اوښکو لانده
لکه چې بیا وهـلي زیــم دي لــرګي
جلانه ! بیا د سرو دردونو ډول ته
غبرګ اچولي لاس کې ډم دي لرګي
سیدجیلاني جلان
کابل
۱۱ سرطان ۱۳۹۸
زندګي بې تا پوره نه وه خوږې !
یادیدلې مې چاره نه وه خوږې !
په اتڼ کې جونې ډیرې اوښتلې
پکې سپینه میناره نه وه خوږې !
ته چې نه وې نجات نه کیده له درده
دریاب و خو کناره نه وه خوږې!
اخیسته د ساه غړپ غړپ ترخې اوبه وې
پیاله وه پکې بوره نه وه خوږې !
د جلان په سترګو شپه جهنم خور و
رڼا لاس کې ورسره نه وه خوږې !4
سیدجیلاني جلان
کابل
۳۰ غبرګولى ۱۳۹۸