ځمکني توت د سرطان په مخنیوي، د مفاصلو د التهاب د پاکوالي او نقرس ناروغۍ د له منځه وړلو لپاره خورا ګټور دي. دا چې دغه مېوه په خپل ترکیب کې پل فنول او په زیاته کچه انتي اکسیدان لري، نو په ټوله کې د ناروغیو پر وړاندې د بدن مقاومت لوړوي او د پوستکي لپاره ګټه رسوي. دغه مېوه زړه ته ورته جوړښت لري، پخه یې خوږه او خامه یې تروش خوند لري. د نړۍ په ډېرو هېوادونو کې یې کرل رواج دي. په زیاته کچه وېټامین سي، وېټامین کا، پوتاشیم او مګنیزیم لري. زړه، سترګې، پوستکی، هډوکي، وېښتان او غاښونه روغ ساتي. د زړښت، سرطان، شکرې، مغزي سکتې، لوړ فشار او معدې ناروغیو مخه نیسي. د هاضمې سیسټم پیاوړی کوي، د مفاصلو دردونه له منځه وړي او د اعصابو له پیاوړتیا سره مرسته کوي. که په خوړلو کې یې اصراف وشي، جانبي عوارض رامنځ ته کوي. د بېلګې په توګه، نس ناستی، د معدې ناروغي، ژېړی او تبه پیدا کوي، چې په بډوډو کې د ډبرو د پیدا کېدو لامل هم کېږي. د دې لپاره چې د بدن لپاره مو یې ګټه کړې وي او په ناروغیو یې اخته کړي نه وی، نو ښه ده چې په خوړلو کې یې له انډول څخه کار واخیستل شي.
حمیدالله حمیدي