د ۲۰۱۳ کال د نوبل د ادبیاتو جایزه کاناډايي کیسه لیکوالې الیس مونرو (Alice Munro) وګټله.

په سویډن کې د نوبل د جایزې د اکاډیمۍ منشي پیټر انګلنډ نن د دې پرېکړې د اعلانولو په مهال وویل چې اغلې مونرو د اوسمهالو لنډو کیسو استاده ده.

دا په نړۍ کې دیارلسمه او په کاناډا کې لومړنۍ لیکواله ده چې د نوبل ادبي جایزه ګټي.

په کاناډا کې تر دې مخکې هیڅ لیکوال د نوبل ادبي جایزه نه وه ګټلې. د نوبل له ادبي جایزې سره به مېرمن مونرو دوولس لکه ډالر هم ترلاسه کړي.

د اسوشیتید پریس خبري اژانس د راپور له مخې کله چې کاناډايي رسنیو د بریټش کولمبیا ایالت په ویکتوریا کې له الیس مونرو سره ټېلفوني تماس ونیوه دې وویل:«په دې پوهېدم چې بریالۍ یم خو هیڅکله مې فکر نه و کړی چې دا جایزه به ګټم.»

الیس مونرو د ۱۹۳۰ میلادي کال د جولای په لسمه د کاناډا په وینګهم (Wingham) کې زېږېدلې، لیکوالي یې د پېغلتوب له لومړیو څخه پیل کړې خو لومړنۍ لنډه کیسه یې په نولس کلنۍ کې (په ۱۹۵۰ کال) خپره شوې ده. دا هغه وخت و چې مونرو د اونتاریو په ویسترن پوهنتون کې د انګلیسي پوهنځي محصله وه.

د مونرو د لنډو کیسو لومړنۍ ټولګه (هیپي شېډز) نومېږي چې په ۱۹۶۸ میلادي کال چاپ شوې ده. د دې لومړنی ناول، چې د نجونو او ښځو ژوند (Lives of Girls and Women) نومېږي، په ۱۹۷۱ میلادي کال چاپ شو.  تراوسه پوري د دې د لنډو کیسو شاوخوا دوولس ټولګې چاپ شوي او د کاناډا تر ټولو مهمه ادبي جایزه (ګورنرجنرال) یې هم ګټلې ده.

«ډیرلایف»، «رن وې» او «ډانس اف دې هیپي شیډز» د دې د لنډو کیسو تر ټولو مشهورې ټولګې دي.

مونرو سربېره پر دې چې په پوهنتون کې ژورنالیزم او انګلیسي ژبه لوستې د کاناډا په سي بي سي راډیو کې یې کار کړی دی.

تېر کال د ادبیاتو د نوبل جایزه چینايي لیکوال مو یان ګټلې وه.