تاند- نوي څېړنې ښيي چې په وروستۍ یوه لسیزه کې په جنوبي قطب کې د کنګلونو ویلي کېدا چټکه شوې ده.
د ټیلګراف ورځپاڼې له راپور سره سم، په نړۍ کې د هوا تودوالی سبب شوی چې په درسته نړۍ کې د اوبو سطحه تر ۲۵ کلونو مخکې درې برابره چټکه زیاته شي.
په تازه څېړنو کې ویل شوي چې د جنوبي قطب د کنګلونو د ویلي کېدو له کبله د سمندر د اوبو سطحه یا اندازه له ۱۹۹۲ م کال څخه را په دې خوا تر اوسه پورې ۸ میلي متره لوړه شوې ده.
تر ټولو زیات تغییر په وروستیو ۵ کلونو کې راغلی دی.
څېړنه وايي چې د سمندرونو په غاړه اوسېدونکي خلک له زیات خطر سره مخامخ دي.
دا څېړنه ۸۴ څېړونکو د ۲۴ سپوږمکیو په مرسته کړې ده.
د څېړنې یوه لیکونکی اندروی شپارد وايي، له کلونو راهیسې دوی اټکل کاوه چې د مځکې په اقلیم یا هوا کې بدلون د جنوبي قطب پر کنګلونو اغېز لري.