تاند- یوه څېړنه، چې د ساوت پاولو پوهنتون څېړونکو کړې، وايي چې د ورځې درې پیالې کافي یا قهوه د شریانونو د بندېدو له مخنیوي سره مرسته کوي.
دا څېړنه، چې پایلې یې د امریکا د زړه د ناروغیو په خپرونه کې خپرې شوي، پر څه باندې ۴ زره ۴۰۰ تنو شوې ده.
په څېړنه کې معلومه شوې چې د دې څېړنې په سلو کې ۵۶ برخوالو ویلي چې دوی د ورځې لږترلږه دوه ځلې کافي څښله، په سلو کې ۱۲ نورو ویلي چې دوی د ورځې تر درې ځلې زیاته کافي څښله.
کومو کسانو چې کافي زیاته څښله نسبت هغو ته چې لږ کافي یې استعمالوله، د شریانونو یا رګونو لږ کلسیم لرل.
څېړونکي وايي چې دوی دا نه ده ثابته کړې چې څومره کافي د رګونو د بندېدو له مخنیوي سره مرسته کوي، خو یقیناً چې کافي او د رګونو نه بندېدا له یو بل سره تړاو لري.
تر دې پخوا د څېړونکو همدې ډلې ویلي و چې کافي د زړه د ناروغیو له درملنې سره مرسته کوي.
کافي یا قهوه په نړۍ کې ډېره استعمالېږي. اټکل کېږي چې په نړۍ کې د ورځې۲ ملیارده او ۲۵ ملیون پیالې کافي څښل کېږي.
ویل کېږي چې کافي یا قهوه۱۱ پېړۍ پخوا په ایتوپیا کې کشف شوه.