تاند- ناسا نن /شنبه/ مریخ ته یوه ستوربېړۍ ولېږله چې په دې سیاره کې د تودوښې په شان د ژوند نښې وڅېړي.
تمه کېږي چې د ناسا ستوربېړۍ به، چې این سایټ نومېږي (InSight)، د دې سرې سیارې رازونه ومومي او مځکې ته به یې راولېږي.
د ناسا ستوربېړۍ نن (شنبه) په کلیفورنیا کې له وندربرګ څخه د (United Launch Alliance Atlas Vا) توغندي په وسیله وتوغول شوه.
که هر څه له پروګرام سره سم پر مخ لاړ شي، دا ستوربېړۍ به، چې په لمریزه انرژۍ کار کوي، د سږ کال د نوومبر په ۲۶ مه د مریخ د استوا کرښې په شمالي برخه کې کښته شي.
په بل پړاو به د دوو کلونو لپاره د مریخ د داخلي ترکیبونو او جوړښتونو په اړه څېړنه وکړي.
د ناسا د ساینسي ماموریتونو مسوول توماس زوربوشن په یوه خبري غونډه کې وویل، دا ستوربېړۍ په اصل کې د تودوښې په شان په مریخ کې د ژوند د نښو څرک لګوي.
دا به په څلور نیم ملیارد کلونو کې، چې مریخ رامنځته شوی، لومړی ځل وي چې د هغې په اړه بشپړه څېړنه کېږي.