تاند- په ۲۰۱۷ م کال د نورو علومو په شان د طب په برخه کې هم ستر ګامونه واخیستل شول.
د بېلابېلو ناروغیو د درملنې لپاره نوې طریقې کشف شوې. د ناروغیو د درملنې لپاره په زیاته پیمانه له بینادي حجرو او جنیټیک انجنیرۍ څخه کار واخیستل شو.
د ځینو مهمو پرمختګونو په لړ کې یو هم د مصنوعي وینې تولید و.
له کلونو راهیسې د بدن د ځینو غړیو لکه د زړه پر ځای له مصنوعي زړه څخه کار اخیستل کېده، خو تر ۲۰۱۷ پورې د مصنوعي وینې امکان نه لیدل کېده.
په دې کال کې د بریتانیا د روغتیا ملي ادارې (این ایچ ایس) په کامیابۍ مصنوعي وینه وازمویله.
همداراز په ۲۰۱۷ م کال امریکايي څېړونکو د جنیټیک انجنیرۍ په مرسته د جنیټیک نابینايۍ درملنه ممکنه کړه.
په همدې کال د بې مودې زېږېدونکو ماشومانو د ودې لپاره د لومړي ځل لپاره مصنوعي رحم جوړ شو.
څېړونکو دا رحم یا زیلانځ په وریو وازمایه. دوی ۸ تر مودې مخکې زېږېدلي وري پکې ۴ اوونۍ وساتل چې ښه وده یې پکې وکړه.
ساینسپوهان هیله لري چې په ۵ کلونو کې به دا ټکنالوژي د انسانانو لپاره چمتو شي.
د طب په برخه کې بل پرمختګ د ناروغ د وینې د حجرو په مرسته د سرطان د ناروغۍ د درملنې په برخه کې و.
دا درملنه، چې کارټي سیل نومېږي، د وینو په حجرو سرطان له منځه وړي. په حقیقت کې د ناروغ د بدن حجرې لیري کوي او له سره یې انجنیري کوي او بېرته یې بدن ته انتقالوي چې سرطاني حجرې تداوي کړي.
د امریکا د خوړو او درملو ادارې دا درملنه تایید کړه.
خو لا هم دا ډول درملنه د ډېرو لپاره ممکنه نه ده ځکه چې د یوه تن پر درملنې ۴۷۵ زره ډالره لګېږي.
همداراز په ۲۰۱۷ م کال ساینسپوهانو د ډي این اې مصنوعي حروف جوړ کړل چې دا د طب په دنیا کې یو ستر پرمختګ وګڼل شو.