تاند- روسیې د جمعې په ورځ/جولای ۱۴/ په یو وار ۷۳ سپوږمکۍ د یوه توغندي په وسیله فضا ته ولېږلې.
روسیې په دې کار د هند ریکارډ، چې د تېر جون په درویشتمه یې جوړ کړی و او په یو وار یې ۳۱ سپوږمکۍ استولې وې، مات کړ.
د دغو سپوږمکیو اکثره د اروپايي هیوادونو دي چې غواړي له فضا څخه په لوړ کیفیت یا لوړ روزولوشن د مځکې عکسونه واخلي.
د روسیې سایوز – ۲۰۱ اي توغندی په قزاقستان کې د روسیې له بایکانور فضايي اډې وتوغول شو.
د روسیې د فضايي تحقیقاتو فدرالي ادارې (روس کازموس) وویل چې د دوی له لوري توغول شوي کوچنۍ سپوږمکۍ د مځکې د څارنې لپاره دي.
روس کازموس نه دي ویلي چې استول شوې سپوږمکۍ د چا دي.
خو ویلي یې دي چې سپوږمکۍ له توغندي جلا شوي او د مځکې د مدار لور ته د تګ په حال کې دي.
د سپېس فونډېش د ادارې د۲۰۱۵ م کال د معلوماتو پر اساس په نړۍ کې د فضايي صنعت ارزښت یا له دې لارې د عایدو اندازه ۳۲۳ ملیارد ډالره ده.