تاند(یکشنبه، د اسد ۱۲) د ځینو حکومتي سرچینو په وینا، د طالبانو او افغان حکومت ترمنځ د اوربند په لومړۍ او دوهمه ورځ شپږ ملکي وګړي د طالبانو لخوا وژل شوي دي.
د اروزګان د والي ویاند زړګي عبادي وویل چې په دغه ولایت کې د طالبانو په بمي چاودنه کې د دوه ماشومانو په ګډون پنځه تنه وژل شوي دي.
د ارزګان د والي ویاند وویل چې یوه چاودنه په دهراود ولسوالۍ کې د اختر په لومړۍ ورځ او بله د ترینکوټ ښار کې د اختر په دوهمه ورځ وشوه.
له بلې خوا د غزني د والي ویاند واحدالله جمعه زاده خبر ورکړ چې په دې ولایت کې یو مدني فعال پرون شنبه د طالبانو لخوا وژل شوی دی.
د جمعه زاده په وینا، طالب جنګیالیو د عصمت الله سلام په نوم یو مدني فعال، په ډزو وژلی دی.
ویل کیږي چې دغه مدني فعال د وسله والو لخوا هغه مهال په ډزو وژل شوی کله چې له خپلې کورنۍ سره له غزنی څخه د اندړو ولسوالۍ ته خپل کور ته روان و.
د دې پیښو په ورته وخت کې، د هرات او لوګر ولایتونو کې د چاودنو شاهد و، د کورنیو چارو وزارت ویاند طارق ارین ویلې وه چې د لوګر موټر بم برید طالبانو ترسره کړی.
خو طالبانو په دغه برید کې خپل لاس لرل رد کړي وه.
د کورنیو چارو وزارت وايي د اوربند له پیل راهیسې د لوی اختر تر دویمې ورځې پورې کومه لویه امنیتي پیښه نه ده شوې.
د کورنیو چارو وزارت هم ټینګار وکړ چې افغان حکومت غواړي اوربند ته دوام ورکړي او تاوتریخوالی کم کړي.