تاند ( جمعه، د اسد ۱۰) د کابل ژوبڼ مسوولان وايي، چې تر۴ میاشتني ګرځبندیز وروسته ژوبڼ ته د راتلونکو سیلانیانو شمیر ډیر شوی دی.
د یاد ژوبڼ آمرعزیز ګل ثاقب رسنیو ته ویلي، چې په ورځني ډول له دې ژوبڼ څخه له ۵۰۰ تر ۷۰۰ سيلانيان لیدنه کوي.
نوموړی وایي هڅې یې پيل کړي، چې په دې برخه کې رامنځته شوی زیان جبران کړي.
د کابل ژوبڼ د کورونا په راتګ سره د سیلانیانو پر مخ وتړل شو او نږدې یوه میاشت کیږي، چې دا ژوبڼ بیرته د خلکو پرمخ پرانیستل شوی دی.
د مالوماتو له مخې، تېر کال کابل ژوبڼ يو میلیون لیدونکي لرل، چې له درکه يې ۲۳ میلیونه افغانۍ عاید ترلاسه شوی، خو سږ کال د ۴ میاشتو ګرځبندیز له امله ۱۵ میلیونه افغانۍ زيان کړی دی.
د کابل د ژوبڼ د مسولانو په خبره په دې ځای کې څه دپاسه ۱۰۰ ډوله ژوي ساتل کېږي.