تاند(دوشنبه، د اسد ۶) افغانستان نن د چین، پاکستان او نیپال د څلوراړخیزې غونډې او دغه راز د افغانستان د تمویلوونکو هیوادونو د ناستې کوربه دی.
د افغانستان د بهرنیو چارو وزارت ویاند ګران هېواد وایي، ټاکل شوې ده چې دا غونډه نن مازدیګر څلور بجې په کابل کې پرانیستل شي.
د نوموړي په وینا، په دې ناسته کې به د افغانستان، چین، پاکستان او نیپال هېوادونو د بهرنیو چارو وزیران برخه واخلي.
د یادولو ده چې شا او خوا دوه اونۍ وړاندې افغانستان د سیمې او نړۍ د بیلابیلو هیوادونو د ناستو کوربه و.
افغان حکومت هغه مهال وویل چې د ناستو هدف یې دا دی چې د افغانستان په اړه سیمه ییزه او نړیواله اجماع ترلاسه شي.
د افغانستان د بهرنیو چارو وزارت دا ناستې ګټورې او د افغانستان لپاره له ښو پایلو لرونکې بللې وې.
دا غونډه داسې مهال جوړیږي چې په هېواد کې د کورونا ویروس تر خپرېدو وروسته د چین په ګډون ډېری هېوادونو خپلې پولې وتړلې او دې چارې صادرات او واردات له زیاتو ستونزو سره مخ کړل.
له دې جلا کابل نن د سام یا د لوړپوړو چارواکو د ناستې کوربه هم دی. د سام ناسته هر کال د افغانستان د حکومت او بهرنیو هېوادونو په تېره بیا تمویلوونکو دولتونو ترمنځ د حساب کتاب او ځوابوینې لپاره جوړېږي.
د افغانستان د مالیې وزارت په یوه بیان کې ویلي چې سږ کال د لوړپوړو چارواکو په دوه ورځنۍ ناسته کې به چې له دوشنبې په ارګ ماڼۍ کې پيلېږي، د جنیوا د دوه اړخیزو ژمنو په چوکاټ کې پرمختګونه وارزول شي او هم به د افغانستان د دولت په پراختیايي تګلارې بحث وشي.
د مالیې وزارت په اعلامیه کې زیاته شوې چې دا غونډه د ۲۰۱۹ کال نومبر ته پلان شوې، خو ولسمشرۍ ټاکنو او بیا د کرونا وُبا خپرېدو اوس وځنډوله.