تاند(دوشنبه، د اسد ۶) د وسله والو طالبانو د سیاسي دفتر ویاند سهیل شاهین پر خپله ټوېټرپاڼه لیکلي، د دوی ډلې په تخار او کندز ولایتونو کې ۳۷ حکومتي بندیان خوشي کړل او د مالي مرستې په ورکولو سره یې کورونو ته واستول.
شاهین ویلې، د دغو بندیانو له ډلې ۲۰ تنه یې په تخار او ۱۷ نور په کندز ولایت کې د دوی له زندانونو ازاد شوي دي.
طالبان داسې مهال افغان بندیان خوشې کوي چې تېره ورځ د طالبانو ځینو سرچینو رسنیو ته ویلي و چې افغان حکومت د دوی ۵۰ نور بندیان ازاد کړي دي او د ۷۰ تنو نورو د خوشې کیدو امکانات هم زیات دي.
سرچینو ویلې دي چې خوشي شوي طالب بندیان د دوی له لورې د ورکړل شوي لېست اړوند وو.
په قطر کې د امریکا او طالبانو ترمنځ د لاسلیک شوې هوکړې له مخې به افغان حکومت د طالبانو ۵۰۰۰ زره بندیان او طالبان به د حکومت زر تنه بندیان خوشي کوي او تر هغه وروسته به د بین الافغاني خبرو لړۍ پیلېږي.
په پام کې ده چې د یادو ناستو یې لومړۍ ناسته د قطر په پلازمینه دوحه کې وشي.