تاند (دوشنبه، د اسد ۶) په افغانستان کې د ناټو ملکي استازي طالبان د ملکي افغانانو د مرګ ژوبلو مسوول وبلل او دا ډله یې له امریکا سره د موافقې په سرغړونه تورنه کړه.
د ناټو ملکي استازي سټیفانو پونټي کورفو پر خپله ټویټرپاڼه کښلي«د طالبانو له لوري د تشدد د نه منلو اندازه د اکثرو ملکي مرګ ژوبلو سبب ده.»
ده همداراز ویلي، د تاوتریخوالي پر دوام د طالبانو فشار په افغانستان کې د جګړې د پای ته رسېدو او د سولې د ټینګښت لپاره رامنځته شوی بې ساری فرصت له خطر سره مخامخوي.
سټیفانو پونټي کورفو له طالبانو وغوښتل چې د تاوتریخوالي د درولو په اړه د قطر په موافقه کې پر خپلو ژمنو عمل وکړي او ژر تر ژره بین الافغاني خبرې پیل کړي.
د ناټو ملکي استازي زیاته کړې، د ملکي افغانانو د کړاوونو د پای ته رسېدو تر ټولو ښه لار دا ده چې د افغانستان د کشالې د سیاسي حللارې لپاره هڅه وشي.
د ناټو ملکي استازي دا څرګندونې وروسته له دې کړي چې په افغانستان کې د ملګروملتو مرستندوی دفتر یوناما نن د افغانستان د تېرو ۶ میاشتو د ملکي مرګ ژوبلو راپور خپور کړ.
په دې راپور کې ویل شوي چې د روان ۲۰۲۰ م کال په لومړیو شپږ میاشتو کې ۱۲۸۲ ملکي افغانان وژل شوي او ۲ زره ۱۷۶ نور ژوبل شوي دي.
https://taand.net/%d9%85%d9%84%da%ab%d8%b1%d9%8a-%d9%85%d9%84%d8%aa%d9%88%d9%86%d9%87-%d9%88%d8%a7%d9%8a%d9%8a-%d8%a7%d9%81%d8%ba%d8%a7%d9%86-%d8%ac%da%ab%da%93%d9%87-%d9%be%d9%87-%d9%86%da%93%db%8d-%da%a9%db%90-%d8%af/