تاند ( شنبه، د اسد ۴) د ایران د صنعتي سکتور چارواکو او د غالیو د پلور اتحادیې مسولانو ویلي، په افغانستان کې جوړو شوو غالیو په نړیوالو بازارونو کې د ایراني غالیو ځای نیولی دی.
دوی زیاته کړې دي، چې دمګړی په نړیوالو بازارونو کې د ایراني غالیو او فرشونو پرځای د افغانستان، هند او پاکستان غالیو او فرشونو بازار خپل کړی دی.
د دوی په خبره دا ایران ته ستره اقتصادي ضربه ده او ایراني غالۍ په نړیوالو بازارونو کې هېڅ مشتري نه لري.
ایراني چارواکو یې د مشتریانو د کمېدو لامل هم د بیو لوړوالی ښودلی دی، خو په حقیقت کې افغان غالۍ په ټوله نړۍ کې تر ټولو په لوړ قیمت پلورل کیږي
د افغانستان په لاس اوبدل شوي فرشونه هم په نړیواله کچه ګرم بازار لري او خلک یې خوښوي.
د ایران د صنعتي سکتور چارواکو او د غالیو د پلور اتحادیې مسولانو ویلي، چې دمګړی یې په نړیواله کچه مشتریان پنځه اتیا سلنه کم شوي دي.
دوی دغه زیاتوي، چې خلک د بیو د ټيټوالي په خاطر پاکستاني او هندي فرشونه هم ډېرخوښوي.
افغان سوداګر وایي، چې په دې وروستیو کې نړیوالو بازارونو ته د غالیو صادرات هم ډیر شوي او لامل یې د مینه والو زیادښت یادوي.