تاند (شنبه، د اسد ۴) د بشر حقونو خپلواک کمیسیون وايي د تېرې چهارشنبې په ورځ د هرات په ادرسکن ولسوالۍ کې د افغان ځواکونو په هوايي برید کې ملکیان وژل شوي دي.
دغه کمیسیون زیاته کړې په وژل شویو کې ښځې او ماشومان هم شامل دي.
تر دې وړاندې د ملي دفاع وزارت ویلي و چې په یاد برید کې یې طالبان په نښه کړي او ولسي خلکو ته هېڅ مرګژوبله نه ده اوښتې.
خو په هرات کې د ادرسکن ولسوالۍ اوسېدونکي وايي په یاده پېښه کې ۸ تنه ملکي وګړي وژل شوي دي.
د سیاسي چارو شنونکي روان وضیعیت د اندیښنې وړ بولي او وايي ددې پر ځای چې بین الافغاني خبرو ته په نږدې کېدو سره تاوتریخوالی کم شي، لاپسې زور اخلي او د مرګژوبلې په شمېر کې په پراخه کچه ډېروالی راځي.
عام خلک وايي روان تاوتریخوالي ته دې د پای ټکی کېښودل شي او د ملکیانو له وژنې دې لاس واخیستل شي.