تاند (شنبه، د اسد ۴) د افغان سولې لپاره د متحده ایالاتو ځانګړي استازي زلمي خلیلزاد له افغانستان څخه د امریکايي پوځیانو د وتلو شرطونه بیا په ډاګه کړل.
خلیلزاد وايي له افغانستان څخه د امریکايي ځواکونو وتل د امریکا او طالبانو تر منځ د شوي تړون یوه برخه ده او باید عملي شي.
هغه دا څرګندونې د امریکا د سولې انستيټوټ په یوه غونډه کې وکړې.
زلمي خلیلزاد دغه راز په خپلو خبرو کې په افغانستان کې له ترورېزم سره د مبارزې هڅې، د امریکايي پوځیانو وتل، د بین الافغاني خبرو پیل او د یو جامع اوربند په اړه هوکړه لیک، د امریکا او طالبانو تر منځ د سولې د تړون مهم عناصر وبلل.
نوموړي د افغان حکومت له لوري د ځیني طالب بندیانو نه خوشې کول او د طالبانو له لوري د تاوتریخوالي نه کمول د سولې په پروسه کې دوه ستر خنډونه یاد کړل.
که څه هم طالبانو ویلي که چېرې افغان حکومت د دوی پاتې بندیان ازاد کړي نو تیار دي چې له اختر وروسته د افغانانو تر منځ خبرې اترې پیل کړي، خو د افغانستان حکومت په خپل دریځ کلک ولاړ دی او د پاتې بندیانو له خوشې کېدو یې انکار کړی.