تاند( دوشنبه، د سرطان۳۰) د ترکیې ولسمشر رجب طیب اردوغان په ناڅاپي ډول د آیا صوفیه جومات ته ورغلی دی او له هغه ځایه یې لیدنه کړې ده.
ایا صوفیه د ترکیې په فرهنګي تاریخ کې تر ټولو مهم ځای دی، چې کله جومات او کله بیا د تاریخي موزیم په توګه ساتل شوی دی.
خودغه ځای نږدې یوه اونۍ وړاندې د ترکیې سترې محکمې له یوه تاریخي موزیم څخه بېرته په جومات بدل کړ.
د ترکیې د ولسمشر له دې پریکړې ډیرو ترکیه میشتو هرکلی وکړ خو غبرګونونه یې هم درلودل.
د نړۍ د کاتولیکانو مشر پاپ فرانسس ویلي وو ، چې د ترکیې له خوا له موزیم څخه پر جومات د استانبول د ایاصوفیې ودانۍ د بدلولو په پریکړه سخت خوابدی شوی دی.
د کلیساګانو نړیوالې شورا هم په ولسمشر اردوغان غږ کړې وو چې له خپلې پرېکړې تېر شي.
دا تاریخي ودانۍ ۱۴۸۸ کاله وړاندې د رومي امپراتور لومړي ژوستینین د مېرمن په امر د کلیسا لپاره جوړه شوې ده.
د دې ودانۍ پر جوړولو ۱۰۰ معمارانو او ۱۰ زره کارګرو ۵ کاله کار کړی ،چې ګومبزه یې ۵۵ متره لوړه او قُطر یې ۳۱ متره دی.
عیسویانو دا ځای د خپل عبادت لپاره جوړ کړی وو، اوس مسلمانان هم له دې مکان نه د خپل خدای تعالی سره د راز او نیاز او عبادت لپاره ګټه اخلي او هغه د خدای کور ګڼي . د عیسویانو او مسلمانانو خدای یو دی . پدې برخه کې د دواړو آسماني او نړیوالو ادیانو د نظر او عقیدې کوم اختلاف نشته . په هر حالت سره دا تاریخي ځای به له پخوا ښه وساتل شي ، ځکه مسلمانانو ته جومات د خدای تعالی د کور حیثیت لري. بنا هیڅ څوک دې پدې برخه کې کوم تشویش نکوي