تاند ( دوشنبه، د سرطان ۳۰) د ننګرهار د کرنې او مالدارۍ ریاست مسولان وایي، چې د دې ولایت په خوږیاڼو ولسوالۍ کې یې ښځینه بزګرانو ته ۸۶ شنې خونې جوړې کړې دي.
د دې ولایت د کرنې او مالدارۍ رئيس انعام الله ساپی وایي، چې دوی دا کار د لوړ ارزښت لرونکو کرنیزو محصولاتو د دودولو او د کوکنارو د کرکېلې د مخنیوي کړي دي.
ساپی زیاتوي په یاد شمیر شنو خونو کې ۴۰ لویې شنې خونې او ۴۶ کوچنۍ شنې خونې شاملې دي.
د ننګرهار خوږیاڼو ولسوالۍ کې ګڼ شمېر نارينه او ښځينه بزګران په شنوخونو کې د سبزیجاتو په کرکېله بوخت دي.
دوی وایي د خپلې کورنۍ اړتیا له دې لارې پرته له ستونزې پيدا کوي او ژوند یې هم ښه روان دی.
د یادولو ده، چې د ننګرهار خوږياڼيو ولسوالي د کرنیزو ځمکو په لرلو سره یو له کرنیزو ولسوالیو څخه ده، چې نږدې ۱۲۰ زره وګړي پکې ژوند کوي.
د یادې ولسوالۍ ډېری اوسیدونکي د سبزیو، غنمو، جوارو، پیاز، کچالو او کوکنارو کرکېله کوي.