تاند ( یکشنبه، د سرطان ۲۹) افغانستان کې د سکانو او هندانو د ټولنې مشر وايي ناپېژاندو کسانو په کابل کې یوه افغان سک ماشومه تښتولې ده.
د سکانو او هندانو د ټولنې مشر خجندر سنګ زیاته کړې، چې ۱۳ کلنه افغان سک ماشومه د جمعې په شپه د کابل له شور بازار سیمې نه تښتول شوې ده.
خجندر سنګ وایي، دوی ډیره هڅه وکړه خو تراوسه یې د ماشومې ځای او درک نه دی معلوم کړی.
د نوموړي په خبره امنیتي ځواکونو هم لا هغه ډول چې لازمه ده د ماشومې د موندلو هڅې نه دي کړي او نه یې هم د دوی امنیت ته سم پام کړی دی.
د یادولو ده، چې د دغې ماشومې پلار څو میاشتې وړاند کابل ښارکې د سکانو پرعبادت ځای برید کې وژل شوی و.
سکان لږه کي وایي له دوی سره هرډول ظلمونه وشول خو حکومت یې عاملین ونه نیول او نه یې هم د دوی د خوندیتوب لپاره تازه اقدامات ترسره کړي دي.
د سکانو یو شمیر مشران وایي، په یو شمیر ولایتونو کې یې په زرګونه جریبه ځمکه غصب شوې خو د حکومت د نه مرستې له امله یې نشي ترلاسه کولای.
بل لورته د کابل امنیتي چارواکو تراوسه په دې تړاو څه نه دي ویلي.