تاند( شنبه، د سرطان ۲۸) فاریاب کې د ملي اردو چارواکي وایي، چې په یو شمیر ولسوالیو کې د افغان ځواکونو او طالبانو ترمنځ په نښتو کې ۱۸ وسله والو طالبانو ته مرګ ژوبله اوښتې ده.
د ۲۰۹ شاهین قول اردو په یوه خبرپاڼه کې وايي، تېره شپه وسله والو طالبانو د فاریاب ولایت د کوهستان او شیرین تګاب ولسواليو اړوندو سیمو کې د ملي امنيتي او دفاعي ځواکونو پر پوستو د بریدونو پلان درلود، چې دفاعي ځواکونو یې مخنیوی کړی دی.
سرچینه وايی په دې نښتو کې ۱۲ تنه طالبان وژل شوي او ۶ نور یې ټپيان دي.
شاهین قول اردو افغان ځواکونو لوري ته د اوښتې مرګ ژوبلې په اړه څه نه دي ویلي.
بل لورته وسله والو طالبانو هم تراوسه په دې تړاو رسنیو ته څه نه دي ویلي.
دغه راز د یوه بل خبر له مخې د پکتیا امنیه قوماندانۍ د امنیت امر لطف الله کامران وایي، څو شیبې وړاندې پر موټرسایکل ځای پر ځای شویو چاودېدونکو توکو هغه مهال ګردیز ښار کې چاودنه کړې، چې له سیمې د امنیتي ځواکونو قتار تېرېده.
کامران زیاتوي، چاودنه کې یو سرتیری او څلور ملکي کسان ټپیان شوي دي.