تاند (جمعه، د سرطان ۲۷) د امریکا او اروپا د فضايي تحقیقاتي ادارو سپوږمکۍ (سولر اوربیتل) د لمر له ۷۷ ملیون کیلومترۍ څخه تصویرونه واخیستل.
دا تراوسه پورې له لمر څخه تر ټولو له نژدې واټن څخه اخیستل شوي تصویرونه دي.
سولر اوربیټل سپوږمکۍ د سږ کال په لومړیو کې د لمر په لور واستول شوه.
د دې سپوږمکۍ له لوري په اخیستل شویو تصویرونو کې د لمر کوچنۍ چاودنې له ورایه ښکاري او د چاودنو په نتیجه کې ملیونونه وړانګې ښکاري.
تر دې وړاندې د لمر دومره څرګند او دقیق تصویرونه نه و اخیستل شوي.
سولر اوربیټل، چې په فبرورۍ میاشت کې د لمر خوا ته لېږل شوې وه، د جون په منځنیو کې د ۴۸ ملیون مایله مزل له کولو وروسته دغه ځای ته ورسېده.
څېړونکي وايي، دا تصویرونه د لمر او د هغو عناصرو په اړه، چې لمر ورڅخه جوړ دی، انسان ته ښه معلومات ورکولی شي.