تاند (جمعه، د سرطان ۲۷) د افغانستان او پاکستان د ملي شوراګانو د دوستۍ د ډلې د اجرايي کمېټې غړیو پرون (پنجشنبه) د پاکستان په ملي جرګه کې سره ولیدل.
د پاکستان د اسوشیتیډ پریس خبري اژانس د راپور له مخې، په دې غونډه کې، چې د پاکستان د ملي جرګې ريیس اسد قیصر هم برخه لرله، پر هغو ستونزو خبرې وشوې چې د دوو هیوادونو ترمنځ سوداګري او د خلکو ترمنځ راشه درشه اغېزمنوي.
په دې غونډه کې پر یو شمېر وړاندیزونو بحث وشو.
د دواړو خواوو پارلماني کمېټو پرېکړه وکړه چې راتلونکې اوونۍ بیا سره وویني څو افغانستان ته د پاکستاني مالونو د ترانزیت او د دوو هیوادونو ترمنځ د سوداري راکړو ورکړو په اړه وړاندې شوې سپارښتنې نهايي کړي.
د خیبر پښتونخوا اعلي وزیر، چې په دې غونډه کې یې د پاکستان د ملي جرګې د ريیس په بلنه ګډون کړی و، ډاډ ورکړ چې په ګمرک کې به د کانتینرونو کار ژر کېږي.
دا غونډه په داسې وخت کې وشوه چې د پاکستاني پوځ په راکټي بریدونو کې د افغانستان په کونړ ولایت کې ۸ ملکیان ووژل شول.