تاند (چهارشنبه، سرطان ۲۵) د متحده ایالاتو د فضايي تحقیقاتو اداره (ناسا) وایي، په راتلونکو دوه اونیو کې به خپل تر ټولو پرمختللی او پياوړی توغندی مریخ ته ولیږي.
یاده اداره وایي د دې توغندي ماموریت دا دی چې هلته به د پخوانیو ژوندیو میکروبونو، چې څه باندې درې نیم میلیارده کاله دمخه ژوندي وو څیړنه کوي.
ناسا وایي دغه دوه اړخیزه سفر به، چې د جولای په ۳۰ پیل کیږي، شپږ میاشتې وخت ونیسي.
دوی زیاتوي ستوربېړۍ به ژر تر ژره خپل هدف ته له رسیدو سره د ډبرو او خاورې نمونې راټولې او زیرمه کړي.
ټاکل شوې چې نمونې به یې په ۲۰۳۱ کال کې ځمکې ته واستول شي.
دوی زیاتوي ساینس پوهان به د فوسیل شوي بکتریا او نورو میکروبونو موندلو لپاره نمونې معاینه کړي.
د یادولو ده چې د ناسا کارمندان هم د کورونا ویروس له امله له میاشتو میاشتو راهیسې له کور څخه کار کوي