خبریاله: عاقله اسد ( چهارشنبه، د سرطان ۱۸) د خوست په مرکز او ولسوالیو کې د یوشمیر ښوونځيو ښوونکي او زده کوونکي د قرنطین په رخصتیو کې د خپلو ښوونځيو شاوخوا او تفریحي ساحې سمسوروي.
دوی وایي دا خبره په عمل کې ثابتول غواړي چې ښوونځي ته د خپل کور په سترګه ګوري.
د خوست د مرکز په ګډون په یو شمېر ولسوالیو کې ښوونکو او زده کوونکو په شخصي لګښت د ښوونځيو سمسورتیا او بیا رغونې ته ملا تړلې ده.
دوی وایي، له قرنطین څخه په ګټې اخیستنې یې دا غوره وګڼله چې د ښوونځيو تفریحي میدانونه، چې پخوا پکې دوړې او د خاورو پوټي ول، اوس مهال په ګلانو، شنو چمنونو او نیالګیو کېنولو ښایسته کړې دي.
د خوست د عبدالحۍ حبیبي لیسې یو ښوونکی وایي، دوی دا پریکړه د کورونا له راتګ سره وکړه.
په ورته مهال د الفتح په نوم ښوونکی وایي دوی د زده کړو لپاره د ښه چاپيریال د چمتو کولو په خاطر دې کار ته ملا تړلې ده.
دی وایي دوی په خپل شخصي لګښت دا چاره پرمخ وړي.
بل لورته د خوست د پوهنې ریاست مطبوعاتي مسوول سیف الرحمن سیراج وايي، د کال په لومړیو کې یې د سمسور ښوونځي په نوم د ښوونځيو د زرغونولو او په هغوی کې د نیالګیو کېنولو لړۍ پیل کړه، چې تر دې دمه یې د ډيری ښوونځیو شاړې برخې شنې کړې او دا لړۍ لاهم دوام لري.
سراج وايي دا کار د ښوونځيو زده کوونکي او ښوونکي پخپله خوښه او له زده کړې سره د مینې له مخې ترسره کوي.