تاند (سه شنبه، د سرطان ۱۷) هلمند کې د نورو کلونو په پرتله سږ کال د پلیو یا مملیو ښه حاصلات ورکړي

د هلمند د کرنې اوبو لګونې او مالدارۍ ریاست مسؤولین په دغه ولایت کې د ممپلیو حاصلاتو د زیاتوالي خبر ورکوي او وايي، ښايي کروندګر نږدې ۲۳ زره مټریک ټنه د پلیو حاصل تر لاسه کړي.

د مسؤولینو په خبره کروندګرو په دغه ولایت کې په شاوخوا ۵ زره هکتاره ځمکه، چې ډېره برخه یې په نادعلي ولسوالۍ کې ده ممپلي کرلي دي.

د بزګرانو په خبره د ممپلیو کرونده په ۳ میاشتو کې حاصل ورکوي او د نورو کښتونو په پرتله ترې ښه عواید تر لاسه کوي.

دوی زیاتوي چې کلونه، کلونه یې په خپلو ځمکو کې کوکنار کرلي، خو د ممپلیو په اندازه حاصل یې ترې ندی تر لاسه کړی.

د سیمې دهقانان په حکومت نیوکه کوي چې دوی په ډېره ارزانه بیه دغه محصول پلوري او له حکومته د ځانګړي بازار غوښتنه کوي.

دوی دغه راز له حکومت غواړي چې د یاد ولایت په نورو ولسوالیو کې دې ددغه محصول لپاره د کښت زمینه برابره شي.

د یادونې وړ ده چې د هلمند ممپلي په هیواد کې د ننه نورو ولایتونو ته استول کیږي، خو بزګران یې د نړیوال مارکیټ غوښتنه کوي.

بلخوا د هلمند د کرنې، اوبو لګولو او مالدارۍ ریاست مسؤولین وايي، هڅه کوي څو په راتلونکي کې ددغه تولید د پروسس لپاره زمینه برابره کړي چې له دې لارې به هلمندي ممپلي ښه بازار پیداکړي، او دهقانان به ښه ګټه تر لاسه کړي.

که څه هم په هلمند کې په زیاته پیمانه کوکنار کرل کیږي، خو د بزګرانو په وینا چې ممپلي یې ښه بدیل دی او په کم وخت کې ډېر حاصلات ورکوي.

ممپلي د اعصابو او حافظې د پیاوړتیا او د هډوکو د ځواکمنولو لپاره غوره مېوه ده، او داسې طبیعي منرالونه پکې شتون لري چې د سږو لپاره ډېر ګټور تمامیږي او قوت ورکوي.