تاند ( سه شنبه، د سرطان ۱۷) د افغانستان د پوهنې وزارت مسولان وایي، چې د خوست ولایت د سپېرې، تڼیو او د دغه ولایت د مرکز اوسېدونکو روان کال د پوهنې له ادارې سره څلور میلیونه ۶۷۳ زره او ۴۱۵ افغانۍ مرسته کړې ده.
د پوهنې وزارت ویانده نوریه نزهت وایي، مرسته شوې پیسې د درسي چاپیریال ښه والي، د ښوونځیو بیا رغونې او د ۱۳ ښوونځیو لپاره د ودانیو جوړولو لپاره ورکړل شوې دي.
د نزهت په خبره دا مرستې د ښوونځیو د شوراګانو له لوري راټولې شوې دي.
هغې زیاته کړه، چې د ښوونځیو شوراګانې، د پوهنې ملاتړو، د زده کوونکو د کورنیو له غړو، ملا امامانو او محلي شوراګانو څخه جوړې شوې دي، چې له کوم امتیاز پرته له معارف وزارت سره مرسته کوي.
د نظر خاوندان دا ډول مرستې هیله بخښونکې او د هیواد لپاره ګټوره بولي.
دوی وایي دا یې ښکاره بیلګه ده، چې ټول افغانان پوه شوي ، د ښوونیز بهیر ملاتړ کوي او د هیواد د راتلونکي فکر له ځانه سره لري.