خبریاله: عاقله اسد (سه شنبه، د سرطان ۱۷) سناتوران وايي سره له دې چې د طالبانو د ډلې ډېر بندیان د حکومت له خوا خوشې شوي، خو د دې ډلې په چلند کې هیڅ بدلون نه دی راغلی.
د مشرانو جرګې د رییس فضل هادي مسلمیار په وینا، هغه طالب بندیان چې د دوحې د سولې له تړون سره سم د افغان حکومت لخوا خوشې شوي باید عادي ژوند وکړي او د سولې په هڅو کې برخه واخلي.
د ښاغلي مسلمیار په وینا، د جګړې ډګرونو ته د دې خلکو بیرته ستنیدا د افغانستان له خلکو سره یو لوی ظلم دی.
له بلې خوا سناتور محمد انور بشلیق وايي، حکومت په هیواد کې د سولې د راوستو لپاره خپل ټول مسؤلیتونه پوره کړې. مګر د طالبانو په کړنو کې هیڅ نرمښت نه دی راغلی.
د هغه په وینا، جګړه د هیواد په ټولو برخو کې دوام لري او د افغانستان بې ګناه خلک قرباني کیږي.
د مشرانو جرګې غړې ګلالۍ اکبري وویل چې حکومت باید لږ تر لږه د دې ډلې د پاتې بندیانو د خوشې کیدو په صورت کې اساسي قانون او د خلکو ګټې په پام کې ونیسي.
د میرمن اکبري په وینا، حکومت باید بندیان په لیکلي ضمانت خوشې کړي ترڅو دا ډاډ ترلاسه شي چې دوی د جنګ مرکزونو ته بیرته نه راګرځي.
په ورته وخت کې، د افغانستان حکومت له زندانونو څخه د ۵۰۰۰ طالب بندیانو خوشې کول د بین الافغاني خبرو د پیل لپاره د دې ډلې یو له مخکینيو شرطونو څخه بللی دی.
افغان حکومت تر دې دمه تر ۴۰۰۰ ډیر طالب زندانیان خوشې کړي دي خو ویلي یې دي چې شاوخوا ۶۰۰ خطرناک طالبان به خوشي نه کړي او د هغوی پر ځای به نور طالبان خوشي کړي.