تاند ( یکشنبه، د سرطان ۱۵) د لبنان دکورنیو چارو وزیر د ترکیه په لبنان کې د جګړې اور ته په لمن وهلو تورنوي.
د لبنان د کورنیو چارو وزیر محمد فهمي وایي ترکیه په دغه هېواد کې د کورنۍ جګړې اور ته په لمن وهي او په لوی لاس د جګړې چټکوالي هڅه کوي.
نوموړي ویلي، ترکیه هڅه کوي له بیلابیلو لارو په دغه هېواد کې ناکراریو ته لمن ووهي او خپلې ګټې ترلاسه کړي.
اللوا ورځپاڼې د فهمي له قوله ویلي، چې د ترکیې په یوه شخصي الوتکه کې یې څلور کسان له څلور میلیون ډالرو سره یو ځای نیولي دي، چې د ده په خبره ګومان کېږي چې دا مرستې په لبنان کې د پیل شویو اعتراضونو پلانوونکو ته لېږدول کېدې.
له دې وړاندې هم لبناني چارواکو پر ترکي چارواکو دا ډول تورونه لګولي دي خو ترکیې بیا دا ډول تورونه تل په کلکه رد کړي دي.