تاند (یکشنبه، د سرطان ۱۵) پنټاګون: افغانستان کې د یوې ترافیکي پیښې له امله یو امریکايي عسکر وژل شوی
د امریکا د دفاع وزارت څخه په خپره شوې اعلامیه کې راغلي چې په فراه ولایت کې د دوی یو عسکر د جمعې په ورځ په یوه ترافیکي پیښه کې وژل شوی دی.
پنټاګون راپور تایید کړی او ویلي یې دي چې وژل شوی عسکر یې وینسنټ سباسټین نومیږي او ۲۱ کاله عمر یې درلوده.
په اعلامیه کې دغه راز راغلي چې دغه حادثه ددوی تر پلټنو لاندې ده.
تر دې وړاندې د افغانستان د بیا رغونې لپاره د امریکا پلټونکې ادارې یا سیګار په یوه راپور کې ویلي وو، چې د روان میلادي کال په لومړیو درییو میاشتو کې په افغانستان کې اووه امریکايي عسکر وژل شوي او ۱۱ نور ټپیان شوي دي.
آرمي ټایمز بیا د خپل راپور په حواله په روان کال کې دغه شمېره ۹ تنه ښودلې ده.
د یادونې وړ ده چې تېر کال په افغانستان کې مجموعاً ۲۰ تنه امریکايي پوځیان وژل شوي وو.