تاند (چهارشنبه، د سرطان ۱۱) د افغانستان د سولې لپاره د امریکا ځانګړي استازي استازي زلمي خلیلزاد د چهارشنبې په ورځ په اسلام اباد کې د پاکستان له باندنیو چارو وزیر شاه محمود قریشي سره د افغانستان د سولې پر پروسې خبرې وکړې.

په دې کتنه کې د پاکستان د بهرنیو چارو وزیر وویل، د افغانستان د سولې پروسه په حساس پړاو کې ده او پکار ده چې نفوذي عناصر پرې نه ښودل شي چې د بین الافغاني خبرو پروسه منحرفه کړي.

قریشي د امریکا او طالبانو په خبرو او د فبرورۍ د ۲۹ نېټې په موافقې کې د پاکستان د رول یادونه وکړه، ویې ویل چې افغان مشران باید له رامنځته شوي تاریخي فرصته ګټه واخلي او د هراړخیزې او ټولشمولې روغې جوړې د یقیني کولو لپاره په ګډه کار وکړي.

قریشي وویل، د افغانستان سوله او ثبات د سیمې او نړۍ د سولې او ثبات لپاره مهم دی. ده د افغانستان د پخلاینې د ملي شورا او د سولې د مرکچي پلاوي د جوړېدا هرکلی وکړ.

ده هیله څرګنده کړه چې د بندیانو د خلاصون بهیر به ژر بشپړ شي او د بین الافغاني خبرو ژر پیلېدو ته به لار هواره کړي.

قریشي له ټولو خواوو په کلکه وغوښتل چې تشدد کم کړي او ورانکارو عناصرو ته اجازه ورنه کړي چې د افغانانو ترمنځ د خبرواترو د پروسې مخه ونیسي.

د پاکستان د بهرنیو چارو وزیر له نړیوالې ټولنې وغوښتل چې خپل هیواد ته د افغان کډوالو د بېرته ستنېدو لار هواره کړي.

د پاکستاني رسنیو د راپور له مخې، د افغانستان د سولې لپاره د امریکا ځانګړي استازي زلمي خلیلزاد د کراچي د ونډ‌و پر بازار د وروستۍ حملې له کبله د مرګ ژوبلو په خاطر له پاکستان سره خواخوږي څرګنده کړه.

خلیلزاد تر دې وړاندې په تاشکند کې د ازبکستان له بهرنیو چارو وزیر کاملوف سره د افغانستان د سولې په اړه خبرې کړې وې.

ده دې کتنې ته په اشاره په یوه ټویټ کې لیکلي« یو باثباته او سوکاله افغانستان په منځنۍ آسیا کې د سیمیزې سولې، امنیت او سوکالې لپاره مُهم دی؛ یوه منځنۍ آسیا چې له بااقتداره او خپلواکه دولتونو جوړه وي او له افغانستان سره په ګډه د سویلیزې آسیا نښلتیا لپاره کار وکړي، به د سیمې او متحدو ایالتونو په ګټه وي»