تاند (چهارشنبه، د سرطان ۱۱) د اروپايي اتحادیې د هوايي خوندیتوب ادارې (EASA) د پاکستان د ملي هوايي شرکت یا پی ای اې او د دې هیواد د ټولو خصوصي هوايی شرکتونو د الوتکو الوتنې د شپږو میاشتو لپاره د اروپايي اتحادیې غړیو هیوادونو ته منع کړې.
اروپايي اتحادیې دا پرېکړه وروسته له دې وکړه په پاکستان کې د ګڼو پېلوټانو د پېلوټۍ اسناد جعلي ثابت شول.
پاکستاني چارواکو د هوايي شرکتونو ۲۸۲ تنه پیلوټان د الوتکو له چلولو منع کړل.
د پاکستان د هوايي چلند وزیر غلام سرور خان د جمعې په ورځ (جون ۲۶) وویل، له پیلوټانو تحقیقات روان دي او د هوايي ملکي چلند ادارې له ۵ جګپوړو مامورینو، چې په درغلیو کې د لاس لرلو په تور له دندو ګوښه کړای شوي دي.
په هغو پیلوټانو کې، چې شک کېږي اسناد به یې جعلي وي، ۱۴۱ تنه یې د پاکستان په دولتي هوايي شرکت یا پي آی اې پورې اړه لري.
دا هوايي شرکت ټولټال ۴۵۰ پیلوټان لري.
د پنجشنبې په ورځ پي آی اې وویل، ۱۵۰ پېلوټان یې په دې خاطر چې د پیلوټۍ اسناد یې جعلي وو، له کاره منع کړي او قراردادونه یې ورسره فسخه کړي دي.
د پی اي اې ویاند عبدالله حفیظ نن (چهارشنبه) وویل چې له اروپايي اتحادیې سره په دې اړه په خبرو بوخت دي.
اوس به هغه ټول هغه مسافر، چې د پاکستان د هوايي شرکتونو په الوتکو کې اروپايي هیوادونو ته تلل او ټکټونه یې هم اخیستي وو، یو انتخاب ولري چې د سفر نېټه وځنډوي او یا بېرته خپلې پیسې واخلي.
پي ای اې نن لومړی وویل چې په موقتي توګه به خپلې ټولې الوتنې ودروي خو وروسته یې وویل چې د دوو ورځو وقفه یې موندلې چې د جولای له لومړۍ تر درېيمې يې د اروپايي اتحادیې په غړیو هیوادونو او بریتانیا کې د الوتکو د کښيناستو اجازه ترلاسه کړې ده.
باید دقیقه څېړنه وسی، داسی نه چی الوتکی ئې هم جعلی او په ( تیرا ) کی جوړی سوی وی.