تاند (چهارشنبه، سرطان ۱۱) د کونړ ولایت د کرنې او مالدارۍ ریاست مسولان وايي، د دې ولایت کروندګرو سږکال د هندواڼو له حاصلاتو شاوخوا ۴۰ میلیونه افغاني عواید ترلاسه کړي.

د کونړ د کرنې او مالدارۍ رئيس نجیب الله وایي، سږکال د دې ولایت په خاص کونړ، څوکۍ، نرنګ او سرکاڼو ولسوالیو کې په څه باندې ۱۰۰۰ جریبه ځمکه کې هنداوڼې کرل شوي دي.

نوموړی زیاتوي، سږني حاصلات یې د تېرو کلونو په پرتله ډیر زیات وو او بزګران هم خوښ دي. د کونړ ولایت د کرنې رئیس زیاته کړه، سږکال په دې ولایت کې له ۱۰۰۰۰ نیولې تر ۱۲۰۰۰ ټنو هندواڼې تولید شوې دي. هغه په خپلو خبرو کې زیاته کړه، د کونړ هندواڼو اخیستلو ته له لرې پرتو ولایتونو خلک هم ورځي. کروندګر هم خوښ دي چې سږکال یې د هندواڼو حاصلات تر بل هرکال ډیر دي او ډیره ګټه یې ترې ترلاسه کړې ده. خو دوی د کرنې له ریاسته په کرنیزه برخه کې د مرستو غوښتنه کوي او وایي که پر وخت یې لاسنیوی وشي نو په هره برخه کې به یې حاصلات تر نورو ډیر وي. ځايي خلک هم د نورو سیمو په پرتله کونړۍ هندوانې خوندورې بولي او له دولت او پانکوالو غواړي چې د باغدارۍ سکتور په لا پیاوړتیا پانګونه وکړي. کرنیز پوهان هم په دې باور دي چې اوسمهال د ډيرو خلکو پام باغدارۍ ته اوښتی او د کرنې ریاست ته هم په کار ده چې په دې برخه کې له دوی سره مرسته وکړي.

په کونړ کې د نارنج، لیمو، مالټې، زردالو او الوچو ترڅنګ اوس د چهارمغزو او شفتالو په باغونو کې هم میلیونونه افغانۍ پانګونه شوې ده.