تاند (چهارشنبه، سرطان ۱۱) ولسمشر غني د یو لوړ پوړي دولتي پلاوي په ملتیا لوګر ولایت ته ورسید.
له ارګ څخه په خپره شوې خبرپاڼه کې ویل شوي چې ولسمشر محمد اشرف غني د یو لوړپوړي دولتي پلاوي په ملتیا نن سهار د لوګر ولایت د عمومي وضیعیت د ارزونې په موخه د یاد ولایت مرکز پل علم ښار ته ورسید.
ټاکل شوې ولسمشر غني په دغه سفر کې د لوګر ولایت د عمومي وضیعیت ارزونه وکړي.
په پام کې ده چې ولسمشر غني به د لوګر ولایت له ملکي نظامي مسؤلینو سربېره له یو شمېر قومي مشرانو، علماوو، مېرمنو، ځوانانو او د بېلا بېلتو ټولنو له استازو سره لیدنه وکړي او د دوی غوښتنې او وړاندیزونه به هم واوري.
ولسمشر غني داسې مهال دې ولایت ته سفر کوي چې په هېواد کې ورځ تر بلې د هوا په ګرمېدا سره جګړه زور اخلي او په یو شمېر ولایتونو کې جګړه ډېره په تېزۍ سره روانه ده.
پدې ورستیو کې د لوګر امنیتي وضیعیت خراب شوی.
دغو جګړو د انساني تلفاتو سربېره د خلکو د ژوند ډېرې برخې له ستونزو سره مخ کړي.
خلک هم وخت ناوخت په حکومت او وسله والو ډلو نېوکې کوي او له ښکلیو خواوو د ملکي تلفاتو د ودریدو غوښتنه کوي.