تاند (سې شنبه، د سرطان ۱۰) د تهران ښار په شمالي برخه کې د یوې سترې چاودنې د غږ له اورېدو وروسته د ښار د دې برخې اسمان تورو لوګیو وپوښه.
د دې خبر د خپرېدو تر شېبې پورې د چاودنې علت څرګند نه دی.
شاهدان وايي چې چاودنه د تجریش میدان یا چوک ته نژدې شوې ده چې د تهران یوه اشرافي سیمه ګڼل کېږي او د ایران د پخواني پاچا ماڼۍ هم دې سیمې ته نژدې دي.
په خواله رسنیو کې خپاره شوي تصویرونه په اسمان کې د اور لمبې هم ښيي.
خو ښاریان وايي چې د چاودنې ږغ خورا لوړ و.
د ایران د اطفایې ویندوی د ایران یوې خبري سرچینې ته ویلي چې په تجریش کې یو روعتیايي مرکز د اور په لمبو کې سوځي او په دغه مرکز کې یو شمېر خلک بند دي.
د ایران نیمه دولتي خبري اژانس اسنا یوازې د چاودنې خبر ورکړی خو نور جزییات یې نه دي څرګند کړي.
د ایران دولتي خبري اژانس ایرنا او د سپاه پاسداران خبري اژانس تسنیم د دې خبر د خپرېدو تر شېبې پورې د چاودنې په اړه څه نه دي ویلي.
دا چاودنه وروسته له دې شوې چې تر دې وړاندې روانه اوونۍ د ایران توغندويي تاسیساتو ته څېرمه یوه زوروره چاودنه وشوه.