خبریال: الله نظر ترين (سې شنبه، د سرطان ۱۰) د هلمند ولایتي چارواکي وایي د دې ولایت د ناوې ولسوالۍ په منګلزو سیمه کې د یوه مازدا موټر په لاره کې د ماین په چاودنه کې دوه تنه وژل شوي او یو تن ټپي دی.
د هلمند د والي ویاند عمر ځواک وایي، مازدا موټر نن له ګرمسیر ولسوالۍ څخه لښکرګاه ښار ته پر لاره و چې د سړک د غاړې ماین پرې وچاودېده.
نوموړی وایي، د چاودنې علت لا معلوم نه دی خو زیاتوي، ډیر کله د وسله والو طالبانو له لوري افغان ځواکونو ته خښ شوي ماینونه پر عامو خلکو چاودنه کوي.
ځواک زیاته کړه، امنیتي ځواکونه سیمې ته رسیدلي او د چاودنې په اړه یې پلټنې پیل کړي.
د دې چاودنې مسولیت تراوسه چا یا کومې وسلوالې ډلې نه دی منلی.
د یادونې ده چې پرون هم د هلمند ولایت په سنګین ولسوالۍ کې د ملکي خلکو په یو دودیزه میله کې د بمي چاودنو له امله ۲۵ ملکیان مړه او ۱۳ تنه نور ټپیان شوې وو.