تاند (دوشنبه، د سرطان۸) د غزني ځايي چارواکي وايي وسله والو طالبانو له تېرو ۱۰ ورځو راهسې د غزني په شاو خوا ۷ ولسوالیو کې په خپلسر ښوونخي پرانستي دي.
وسله وال طالبان په داسې حال کې په خپلسر د ښوونځیو پرانستلو ته خلک اړ کړي، چې دولت تر راتلونکې سپتمبر میاشتې پورې ټولې تعلیمې ادارې بندې کړي دي.
وسله والو طالبانو په میدان وردګ ولایت کې ه تر خپل کنترول لاندې سېمو کې د ښوونځیو تر پرانستلو وروسته، په غزنی کې هم د خپل کنترول لاندې سیمو کې ځايي خلک د ښوونځيو پرانستلو ته اړ کړي دي.
د غزنی ولایتي ادارې تائید کړې چې وسله والو طالبانو تر خپل کنترول لاندې سېمو کې له تیرو لسو ورځو راهیسې ښوونځي پرانستي دي.
د ولایتي چارواکو په وینا وسله وال طالبان په داسې حال کې ښوونځي پرانیزي چې د کورونا وایرس د مخنیوي لپاره یې هیڅ تدابیر ورته نه دي نیولي، دوی انديښنه ښودلې چې که دولت په دې اړه جدي اقدام ونه کړي په کورونا وایرس د لا زیات اخته کیدو ویره موجوده ده.
خو پر دې ټولو اندېښنو سربېره لا هم د پوهنې وزارت د وسله والو طالبانو له لوري د ښوونځیو د پرانستلو په تړاو څه نه دي ویلي.