تاند (شنبه، د سرطان ۷) د ولسمشر ډانلډ ترمپ حکومت دې ته نژدې شوی چې تر مني پورې له افغانستانه د ۴ زره نورو پوځیانو د ایستلو پرېکړه نهايي کړي.
سي این این تلویزیون د امریکايي چارواکو په قول ویلي چې له دې سره به په افغانستان کې د امریکايي پوځیانو شمېر، چې اوس ۸۶۰۰ دی، ۴۵۰۰ ته رالږ شي او دا به په ۲۰۰۱ م کال افغانستان ته د امریکايي پوځیانو د استولو له لومړیو وختونو پرته په دې هیواد کې د امریکايي پوځیانو تر ټولو کم شمېر وي.
سي این این وايي، د ځواکونو د شمېر له کمېدو سره په دې مخالفت کېږي چې طالبان له دې سره سره چې په فبرورۍ میاشت کې یې له امریکا سره تاریخي موافقه لاسلیک کړه، د افغانستان د حکومت پر ضد له تاوتریخوالو لاس نه اخلي.
راپور وايي، په داسې حال کې چې لا پرېکړه نهايي شوې نه ده، د امریکا دفاع وزیر مارک ایسپر پر دې پلان تېره اوونۍ د ناټو له متحدانو سره خبرې وکړې او د جمعې په ورځ یې په بروکسل کې د ناټو له چارواکو سره پرې بحث وکړ.
د ناټو سرمنشي ینس ستولتنبرګ د جمعې په ورځ له ایسپر سره تر خبرو مخکې وویل «موږ به د افغانستان په اړه خپلې خبرې تعقیب کړو. ناټو به د سولې د پروسې د ملاتړ لپاره د خپلو ځواکونو شمېر د امریکايي پوځیانو د شمېر په تناسب کم کړي.دا کار به د ناټو د غړیو هیوادونو په پوره همږغۍ وشي.»
د امریکا او طالبانو د قبرورۍ د نهه ویشتمې نېټې د موافقې پر اساس ټول امریکايي پوځیان په هغه صورت کې چې طالبان پر خپلو ژمنو ودرېږي په ۱۴ میاشتو کې یعني د راتلونکي م کال تر مې میاشتې پورې له افغانستانه وځي.