تاند، چهارشنبه، د سرطان ۴مه: امریکا له افغانستان سره د سوداګریزې راکړې ورکړې لپاره د تورخم، چمن او غلام خان بندرونو د پرانیستې هرکلی کړی دی.
پاکستان، د تورخم او چمن بندرونه له دریو میاشتو راهیسې د کورونا په بهانه د افغاني صادراتو پر مخ تړلي وو، خو د غلام خان بندر بیا له دوه کلونو راهیسې د ستونزې ښکار و چې د یکشنبې په ورځ د روانې جون میاشتې په ۲۲مه دا ټول بندرونه پرانیستل شول.
د جنوبي او مرکزي اسیا لپاره د امریکا د بهرنیو چارو وزارت سیاسي بیورو پر ټویټر پاڼه په دې اړه لیکل شوي، د افغانستان او پاکستان تر منځ د تجارت پراختیا به د دواړو هیوادونو د اقتصاد لپاره ګټه وکړي: (( خوشاله شوو چې د افغانستان او پاکستان تر منځ د سوداګریزو اړیکو د ودې لپاره غلام خان بندر پرانیستل شو، دا به د دواړو هېوادونو لپاره اقتصادي ګټه وکړي.))
پاکستان له افغاني لوري سره پریکړه کړې چې د افغاني صادراتو پر مخ د تورخم، چمن او غلام خان بندر د پرانیستې سره به د ډریورانو د کرونا ټیسټونه ترسره کېږي او هر یو موټر به هم له دواړو غاړو ضدعفوني کېږي.