تاند، شنبه، د جوزا ۳۱مه: د عامې روغتیا وزارت وايي په تېرو ۲۴ ساعتونو کې د هیواد په کچه ۵۴۶ تنه په کوروناویروس اخته شوي چې ورسره کورونا ناروغانو شمېر ۲۸زره او ۴۲۴ ته لوړ شوی دی.
د دغه وزارت د معلوماتو په اساس په تېرو ۲۴ ساعتونو کې ۲۱ تنه له دغې ناروغۍ مړه شوي او ۳۳۰ نور بېرته روغ شوي دي.
د ورغتیا وزارت د رسمي شمېرو په اساس په افغانستان کې د کوروناویروس د خپرېدو له پیل راهیسې تر اوسه ۵۶۹ تنه دغې ناروغۍ مړه کړي او نږدې ۸۳۰۰ تنه بېرته ترې روغ شوي دي.
د روغتیا وزارت معلومات ښيي چې د افغانستان په لابراتوارونو کې تراوسه د کوروناویروس ۶۳زره او ۹۵۱ معاینې شوي چې له دې شمېرې ۲۸زره او ۴۲۴ یې مثبتې تشخیص شوي دي، خو اوس د تشخیصه کیټونو د کموالي او په معایناتو کې د ځنډ له امله زیات شمیر افغانان چې په دې ناروغۍ اخته شوي د معاینې لپاره لابراتوارونو ته نه ځي او په خپلو کورونو کې تر درملنې لاندې دي.
دې مسلې ته په پام ښايي په افغانستان کې د کوروناویروس له امله د مړه شویو او په دې ویروس د اخته شویو کسانو شمېره له هغې پورته وي چې د افغانستان د عامې روغتیا وزارت یې په رسمي ډول له رسنیو سره شریکوي.
د امریکا د جانس هاپکینز پوهنتون معلومات ښيي چې د شنبې تر ورځې په نړۍ کې نږدې اته میلیونه او ۶۶۷زره په کروناویروس اخته شوي چې له دې شمېرې څه باندې ۴۶۰زره تنه مړه شوي.