تاند، جمعه، د جوزا ۳۰مه: د امریکايي ځواکونو د مرکزي قومندانۍ مشر جنرال کینت مکنزي اعلان کړی چې د قطر د دوحې تړون په اساس یې په لومړي پړاو کې خپل ځواکونه په افغانستان کې ۸۶۰۰ تنو راکم کړي دي.
نوموړي د آسپېن انسټیټوټ په کوربه توب یوې مناظرې ته په وینا کې ویلي، امریکا د سولې تړون له مخې خپله برخه کار بشپړ کړی دی او سرتېري یې د ۸ زروشاوخوا په افغانستان کې پرېښي دي.
جنرال مکنزي وايي، د هوکړې له مخې هم ټاکل شوې وه چې امریکا به په ۱۳۵ ورځو کې سرتېري د جولای تر منځ مهاله پورې ۸۶۰۰ تنوته راکموي او د ۲۰۲۱ کال تر می پورې به ټول سرتېري له افغانستان څخه باسي، په دې شرط چې طالبان به له نورو ترهګرو ډلو سره اړیکې غوڅوي: (( زه هیله من یم چې شرایط تکمیل شي، تر څو موږ باوري شو چې له افغانستان څخه زموږ پر هیواد د برید امکان نشته.))
جنرال مکنزي زیاته کړې دا ټولو ته معلومه ده چې طالبان د داعش ډلې دوستان نه دی، خو اړتیا دا ده چې طالبان ثابته کړي چې د القاعدې پر ضد څه کوي: (( دا تش په خوله ویل کافي نه دي، بلکې په عمل کې ثابتول یې مهم دي.))
دا په داسې حال کې ده چې جنرال مکنزي تر دې وړاندې ویلي وو طالبانو د امریکايي ځواکونو وتلو ته زمینه نه ده برابره کړې، له همدې کبله د دې طرفدار دی چې په افغانستان کې یو شمېر سرتېري وساتل شي.
دا په داسې حال کې ده چې د امریکا ناڅاپي خروج په اړه د جګړې د زیاتېدو اندېښنې زیاتې دي، خو افغان حکومت ویلي، د امریکايي ځواکونو وتل به پر افغانستان کوم فشار رانه وړي او دا د دوی خپله پرېکړه ده.