تاند (سې شنبه، د جوزا ۲۷) د افغانستان د بهرنیو چارو سرپرست وزیر محمدحنیف اتمر د یوه جګپوړي پلاوي په مشرۍ ایران ته ځي چې د دغه هیواد له مشرانو سره په ایران کې د وژل شویو افغان پناه غوښتونکو په اړه خبرې وکړي.

د ایران نیمه دولتي (مهر) خبري اژانس وايي، د افغانستان ولسمشر اشرف غني د بهرنیو چارو سرپرست ته سپارښتنه کړې چې ایران ته لاړ شي او په دغه هیواد کې د پناه غوښتونکو د سپرلۍ پر موټر د ایراني ځواکونو د ډزو په نتیجه کې د یو شمېر پناه غوښتونکو د وژل کېدو په اړه پلټنه وکړي.

مهر خبري اژانس ویلي چې ښاغلی اتمر به راتلونکې اوونۍ تهران ته سفر وکړي.

د افغانستان د بهرنیو چارو وزارت تراوسه په دې اړه څه نه دي ویلي.

د جون په درېمه نېټه د ایران په یزد ولایت کې ایراني پولیسو د افغان پناه غوښتونکو د سپرلۍ بر موټر ډزې وکړې چې په نتیجه کې یې موټر اور واخیست، په دې پېښه کې ۳ افغان پناه غوښتونکي ووژل شول او ۴ نور سخت ژوبل شول.

ایراني پولیسو په روغتون کې سوځېدلیو افغان پناه غوښتونکو ته زولنې اچولې وې. د دوی دا کار په تهران کې د افغانستان د سفیر عبدالغفور لېوال له غبرګون سره مخامخ شو او د نوموړي له انتقاده وروسته له ټپیانو زولنې لېرې کړل شوې.

د امنیت شورا پریکړه، ایران ته د وروستیو پیښو د سپیناوي لپاره پلاوی استوو

د ایران د کورنیو چارو وزارت د بهرنیو اتباعو د څانګې عمومي رييس مهدي محمودي د تېرې اوونۍ د چهارشنبې په ورځ وویل، پولیسو موټر ته د درېدو امر وکړ خو کله چې چلوونکي د دریش امر ونه مانه، دوی پرې ډزې وکړې.

تر دې پېښې وړاندې د ایران سرحدي پولیسو شاوخوا ۵۰ افغان پناه غوښتونکي له نیولو او وهلو – ټکولو وروسته هریرورد سین ته وغورځول چې له کبله یې اکثره مړه او تري تم شول.

خو د ایران د بهرنیو چارو وزارت ادعا کوي چې دا پېښه د افغانستان په خاوره کې شوې او له دوی سره تړاو نه لري.