تاند، دوشنبه، د جوزا ۱۲مه: نن د جون میاشتې لومړۍ نېټه په نړۍ کې د ماشوم له نړیوالې ورځې سره برابره ده، خو د دې ورځې په مناسبت یونېسف یا ماشومانو لپاره د ملګرو ملتونو وجهي صندوق خبر ورکوي چې افغانستان کې د ماشومانو وضعیت د اندېښنې وړ دی .
په افغانستان کې د یونیسف مطبوعاتي مسؤل احمد جان نوزادي وایي چې د کورونا ویروس له خپرېدو مخکې ۳،۷ میلیونه ماشومان ښوونځیو ته له تګ څخه محروم وو، خو اوس ۹،۵ میلیونه نور ماشومان هم ښوونځیو ته له تګه لیرې پاتې دي.
د نوموړي په خبره اوس وخت کې ۶۰۰ زره افغان ماشومان له سختې خوار ځواکۍ سره مخ دي، چې په وخت درملنه ورته مهمه ده.
په ورته مهال د افغانستان د بشري حقونو خپلواک کمېسیون چارواکي وایي، چې لاهم زرګونه ماشومان د کورنیو لپاره د سختو کارونو ترسره کولو، قاچاق، جنسي ځورونې او د تاوتریخوالي له داسې نورو ډولونو سره مخامخ دي.
د کار او ټولنیزو چارو وزارت د معلوماتو پر اساس، اوسمهال څه باندې دوه میلیونه ماشومان په افغانستان کې په کار بوخت دي چې له دې ډلې ۱،۲ میلیونهیې سخت یا شاقه کارونه ترسره کوي.