تاند، پنجشنبه، د جوزا ۸مه: د سوداګرۍ او صنایعو خونه وايي، په تېرو دوه میاشتو کې د کورونا د خپرېدو او قرنطین له امله په هېواد کې د ۴۰ سلنه فابریکو کارونه تړل شوي دي او ۳۰ سلنه فابریکو خپل فعالیتونه ۵۰ سلنه راکم کړي دی.
د سوداګرۍ او صنایعو خونې مرستیال سخي پیمان وايي، په تېرو دوه میاشتو کې ګڼې فابریکې د خامو موادو د نه درلودلو له امله له فعالیته غورځېدلې دي.

نوموړی وايي، د خامو موادو د ستونزې تر څنګ د بازارو سوړوالی، ګرځبندیز او نور مشکلات هم د دوی د فعالیتونو مخه نیسي: (( ګڼو فابریکو خپل کارګر رخصت کړي دي، ځکه چې ډېر بد وضعیت راغلی دی.))

د کابل صنعتي پارک کې د یوې فابریکې څښتن عبدالوکیل وايي، له دریومیاشتو راهیسې یې د پایپونو فابریکه تړلې ده او ګن کارګر یې له لاسه ورکړي دي: (( نږدې ده چې فابریکه مې سقوط وکړي، ځکه ټول ساختماني کارونه په ټپه ولاړ دي.))

په همدې حال کې حکومت وايي، د صنایعو د ملاتړ لپاره په یوه فابریکه کار کوي خو د سوداګرۍ او صنایعو وزارت په دې اړه له څه ویلو ډډه کوي او د فابریکو خاوندان هم وايي چې حکومت په دې تړاو یو اقدام هم نه دی پورته کړی.