تاند (جمعه، د وږي/ سنبلې ۲۷ مه) د خیبر پښتونخوا په کواټ کې له مرګوني چاودنې وروسته د وژل شویو کسانو شمېر ۲۸ تنه وژل شوي او تر ۸۰ ډېر نور ژوبل شوي دي.
د خیبرپښتونخوا د روغتیايي چارواکي وايي چې کابو ۱۰۰ تنه مړه او ټپیان وروړل شوي دي. د کواټ مرستیال کمېشنر رسنیو ته ویلي چې برید لا هم روان دی. هغه وویل چې اکثره وژل شوی کسان پولیس دي.
پاکستاني چارواکي وايي، چاودنه یوه جومات ته څېرمه د پولیسو پر مرکز هغه مهال شوې چې لمونځ کوونکو د جمعې لمونځ پای ته رسولی و.
د پولیسو د سرچینو په وینا، له چاودنې وروسته د پولیسو او وسله والو حمله کوونکو ترمنځ نښته هم شوې ده.
پاکستاني رسنۍ د امنیتي سرچینو په قول وايي چې لږترلږه ۶ حمله کوونکي هم وژل شوي دي.
په پیل کې یوه ځانوژونکي د پولیسو د مرکز پر دېوال چاودنه وکړه او وروسته نور مرکز ته ننوتل. د چاودنې له کبله د روزنیز مرکز د ودانۍ ډېره برخه ونړېده.
تر اوسه هېڅ ډلې د دې چاودنې مسوولیت نه دی منلی او پاکستاني چارواکو هم د برید د احتمالي انګېزې په اړه څه نه دي ویلي.