تاند/سه شنبه د وږي ـ سنبلې ۳مه/ د ټرمپ اداره په پام کې لري چې شاوخوا ۲۰۰ زره بهرنیو اتباعو ته ورکړل شوې سوداګریزې او سیاحتي ویزې لغوه کړي.
دا هغه کسان دي چې په امریکا کې یې د پناه غوښتنه کړې یا یې د پناه غوښتنې پروسه روانه ده.
اسوشیټېډ پرېس د امریکا د بهرنیو چارو وزارت د اسنادو او دوو امریکايي چارواکو له قوله راپور ورکړی چې که دا پرېکړه له قانوني ننګونو سره مخ نه شي او بدله نه شي، نو د ۲۰۱۶ او ۲۰۲۶ کلونو ترمنځ صادرې شوې ویزې به په راتلونکو اوونیو کې لغوه اعلان شي.
دغه اقدام به د امریکا د کورني امنیت وزارت په همغږۍ ترسره کېږي.
راپور زیاتوي چې د امریکا د بهرنیو چارو وزارت په تېرو ۱۸ میاشتو کې شاوخوا ۱۷۵ زره ویزې هم لغوه کړې دي.
کارپوهان وایي، دا پرېکړه به د پناه غوښتونکو لپاره د سفر او قانوني پاتې کېدو شرایط نور هم سخت کړي.
دوی زیاتوي که عملي شي، زرګونه کسان به له ناڅرګند وضعیت، مالي زیانونو او امریکا ته د سفر له محدودیتونو سره مخ شي.