تاند ( شنبه د اسد/زمري ۲۴مه) د هند د بهرنیو چارو وزارت ویاند اعلان کړی چې نوی ډیلي هڅه کوي له افغانستان سره خپلې پخوانۍ اړیکې لا پراخې کړي او د دواړو هېوادونو ترمنځ همکاري پیاوړې کړي.
د هند د بهرنیو چارو وزارت ویاند رندیر جیسوال ویلي، چې په دې وروستیو کې د دواړو هېوادونو د چارواکو لیدنو او سفرونو د ګډې همکارۍ د پراختیا لپاره زمینه برابره کړې ده.
د هغه په وینا، دغه تعاملات کولی شي د پراختیا، سوداګرۍ او سیمهییز اتصال په برخو کې د همکارۍ د زیاتېدو لامل شي.
جیسوال ټینګار کړی چې هند غواړي له کابل سره خپلې اړیکې لا پیاوړې کړي.
هند په وروستیو کلونو کې هڅه کړې چې له افغانستان سره خپلې اړیکې د ډیپلوماټیکو تعاملاتو، بشري مرستو او اقتصادي همکاریو له لارې وساتي او پراخې یې کړي.
نوي ډیلي همداراز له سیمهییز اتصال او اقتصادي همکاریو سره د اړیکو په چوکاټ کې ټینګار کوي.
بل لورته سیاسي کارپوهان وایي، د هند دا دریځ ښيي چې نوي ډیلي غواړي له افغانستان سره خپلې اړیکې د اقتصادي، بشري او سیمهییزو همکاریو له لارې وساتي.
د دوی په وینا افغانستان لپاره د هند له لوري د سوداګرۍ، ترانزیټ او بشري مرستو پراختیا کولای شي اقتصادي او سیمهییزې اړیکې پیاوړې کړي؛ خو د دې همکاریو دوام به تر ډېره د دواړو لورو د سیاسي تعامل، امنیتي شرایطو او سیمهییزو پرمختګونو پورې تړلی وي.