تاند (چهارشنبه، د زمري/ اسد ۲۱ مه) د افغانستان د ولسي جرګې پخوانی غړی رمضان بشردوست په یوه مرکه کې ویلي چې د طالبانو چارواکي د ساده ژوند او د اسلام د لومړنیو خلفاوو د حکومتولۍ د ادعا خلاف، اوس تر پخوا ډېر په تشریفاتو، تجمل او ګڼو ساتونکو بوخت دي.
بشردوست له دویچهوېلې سره په مرکه کې ویلي، د طالبانو او د تېر جمهوري نظام د چارواکو ترمنځ د تشریفاتو له پلوه ډېر توپیر نه شته او په ځینو مواردو کې طالبان ان تر پخوانیو چارواکو هم ډېر تشریفات کاروي.
د هغه په وینا، طالب چارواکي ځانګړي تشریفات لري او د بېلابېلو چارواکو لپاره بېلابېلې څوکۍ ټاکل شوې دي؛ ان د رئیسالوزرا څوکۍ د نورو چارواکو له څوکیو لوړه ده.
بشردوست ادعا کوي چې طالب چارواکي له ګڼو ساتونکو او موټرو سره تګ راتګ کوي او حتی جوماتونو ته د هغوی د تګ پر مهال هم ساتونکي ورپسې ولاړ وي.
هغه وايي، د طالبانو اداره د تشریفاتو او حکومتي امتیازاتو له پلوه له پخواني نظام سره اساسي توپیر نه لري.
طالبانو بیا له واک ته رسېدو وروسته په وار وار ټینګار کړی چې د دوی چارواکي ساده ژوند کوي، له تشریفاتو څخه ډډه کوي او د پخواني جمهوري نظام له طریقې سره توپیر لري.
رمضان بشر دوست، چې له پخوا راهیسي په زغردو خبرو مشعور دی، د طالبانو له واک ته رسېدو وروسته په کابل کې اوسي. طالبان عموماً پر خپلو چارواکو او حکومتي چارو نیوکې چندان نه شي زغملی له دې کبله د رمضان بشردوست څرګندونې د هغه د لوړ جرات ښکارندويي کوي.